Vengriya musiqa uyi O‘zbekiston madaniy jamoalari bilan hamkorlikka qiziqish bildirmoqda
- Жанр: Yangiliklar
- Смотрели: 15
- Формат: mp4
- Дата релиза: 05-04-2024, 15:54
"Vengriya musiqa uyi" — Budapesht shahridagi interaktiv ko‘rgazma, konsert va musiqiy-madaniy markaz sanaladi. U 2022 yil yanvar oyida Budapeshtdagi Varoshliget jamoat parki hududida joylashgan "Budapesht bog‘lari" madaniy loyihasi doirasida ochilgan.
Muassasa keng jamoatchilikni mamlakatning boy musiqiy merosi bilan yaqindan tanishtirish maqsadida tashkil etilgan. Markaz taniqli yapon arxitektori Sou Fujimoto tomonidan loyihalashtirilgan. Qurilish jarayonida bog‘dagi birorta daraxtga zarar yetmagan.
Markaz binosi futuristik zamonaviy dizayn maxsus muhandislik yechimlari bilan uyg‘unlashgan. Uch qavatdan iborat bino konstruktiv elementlar bilan biridan ajralib turadi.
Musiqa uyining podvalida 1000 m2 maydonga ega doimiy ko‘rgazma mavjud bo‘lib, unda musiqiy labirint shaklida yaratilgan "Ovoz o‘lchovlari - kosmos va vaqtdagi musiqiy sayohatlar" doimiy ko‘rgazmasi joylashgan.
Bu ko‘rgazma haqiqatan ham misli ko‘rilmagan tajriba bo‘lib, dunyoning boshqa hech bir joyida o‘xshashi yo‘q. Uning ramziy gumbazi yoki qo‘ng‘iroq xususiyati tashrif buyuruvchilarni o‘ziga jalb qiladi va ularni virtual sayohatga chorlaydi. Bu yerda so‘nggi ikki ming yillikning qariyb 3000 ta musiqasini eshitish mumkin.
Markazning birinchi qavatida 300 va 100 o‘rinli ikkita konsert zali, yuqori qavatida esa tadqiqot va ta’lim olish uchun mo‘ljallangan xonalar mavjud. Ularni texnik jihozlar bilan ta’minlash uchun loyihaga mahalliy integrator "Interton Group" jalb qilingan.
Umuman olganda, ko‘rgazma venger milliy musiqasining paydo bo‘lishidan to hozirgi kungacha bo‘lgan rivojlanish bosqichlarini aks ettiruvchi 50 dan ortiq installyasiyalarni o‘z ichiga oladi.
Britaniyaning "The Guardian" gazetasi o‘quvchilari 2024 yil yanvar oyida "Vengriya musiqa uyi"ni Yevropadagi muhim maskanlar ro‘yxatiga kiritish uchun ovoz berishdi.
Musiqa uyi rahbariyati bilan o‘tkazilgan muzokaralar natijasida shakl va janrlarning boyligi hamda rang-barangligi bilan ajralib turadigan va jahon madaniy makonining ajralmas qismi hisoblangan O‘zbekistonning boy musiqasi, folklor va xalq amaliy san’atini targ‘ib qilish doirasida qo‘shma tadbirlar o‘tkazish bo‘yicha kelishuvlarga erishildi.
